Галоўная / Навiны / Навiны рэспублiкi
10.09.2021

Урады Беларусі і Расіі адобрылі 28 саюзных праграм

Урады Беларусі і Расіі адобрылі 28 саюзных праграм

Саюзныя праграмы адобраны на пасяджэнні Савета Міністраў Саюзнай дзяржавы, перадае карэспандэнт БЕЛТА.

"Сёння зроблены вельмі важны крок наперад на шляху стварэння да 2024 года асноў функцыянавання адзінай эканамічнай прасторы ад Мінска да Уладзівастока. Адобраны асноўныя напрамкі рэалізацыі палажэнняў Дагавора аб стварэнні Саюзнай дзяржавы на 2021-2023 гады і 28 саюзных праграм, якія ў далейшым будуць вынесены на зацвярджэнне Вышэйшага дзяржсавета, - сказаў прэм'ер-міністр Беларусі Раман Галоўчанка. - Рэалізацыя гэтых праграм, на нашу думку, стане магутным імпульсам для нарошчвання аб'ёмаў узаемнага гандлю, развіцця сумесных вытворчасцей і скаардынаваных мер падтрымкі нацыянальных вытворцаў. Закладзена база для правядзення ў бліжэйшы час сумеснай ацэнкі эканамічных і палітычных рызык, каб прымаць на гэтай аснове своечасовыя меры ў адказ".

У энергетычнай сферы дасягнуты дамоўленасці аб паэтапным фарміраванні аб'яднаных рынкаў нафты, газу, электраэнергіі, што выраўнуе ўзровень затрат на энергетыку для расійскіх і беларускіх кампаній. Таксама бакі дамовіліся і аб камфортнай цане, па якой прыродны газ будзе пастаўляцца ў Беларусь у наступным годзе.

"Паводле нашых ацэнак, толькі прамы эфект ад рэалізацыі інтэграцыйнага пакета для Беларусі прагназуецца ў росце ВУП прыкладна на $1 млрд, не ўлічваючы дадатковыя магчымасці для беларускага бізнесу на расійскім рынку. Значным таксама з'яўляецца сацыяльны блок саюзных праграм. У гэтай сферы асаблівы акцэнт зроблены на гарманізацыі падыходаў да пенсійнага забеспячэння, мерах сацыяльнай абароны і падтрымкі асобных катэгорый грамадзян, укараненні адзіных прынцыпаў абароны правоў спажыўцоў", - дадаў Раман Галоўчанка.

Старшыня ўрада Расіі Міхаіл Мішусцін адзначыў, што саюзныя праграмы вызначаюць дакладную траекторыю сумеснай работы практычна ва ўсіх сферах, у ліку якіх прамысловасць, фінансы, энергетыка, аграпрамысловы комплекс, падатковае і мытнае рэгуляванне, грашова-крэдытная палітыка. Яны датычацца транспартнага рынку, маркіроўкі тавараў, плацежных сістэм, ветэрынарнага і фітасанітарнага кантролю, абароны правоў спажыўцоў і ўніфікацыі заканадаўства ў працоўнай сферы. "Акрамя таго, мы прынялі сумесную заяву кіраўнікоў урадаў Расіі і Беларусі, у якой адлюстравалі прынцыповыя задачы саюзнага будаўніцтва. Мы разлічваем, што адобраныя сёння рашэнні будуць зацверджаны Вышэйшым дзяржсаветам", - дадаў ён.-0-

БЕЛТА - Навiны Беларусi